يوليو 30, 2021

اخبار تحيا مصر

جريدة ورقيه وموقع الكترونى

كن إنسانا تسعد بحياه كريمه في ظل زوجه وطفلا جميل

كن إنسانا تسعد بحياه كريمه في ظل زوجه وطفلا جميل

 

بقلم : فهيم سيداروس

 

صباح الخير

 

أتوماتيك كنت بعذر زوجتي بعد فتره الولاده القيصريه وبعد فتره ٢٥ عام ربع قرن

الأن فهمت أكثر بعد قرأتي لهذا المقال

 

كنت ذات إحساس جدا بما تعانيه زوجتي إثناء الحمل وبعد الوضع وبالأخص كان وضعها قيصري.

 

أعذروا نسائكم أوماتيك أثناء فتره الحمل وبعد الوضع.

 

ما لا تعرفه عن الولادة القيصرية!!

الموضوع خطير

القيصري من أصعب العمليات حرفيا

دي اصلا عالميآ متصنفة من أخطر العمليات اللي تؤدي لاقدر الله للوفاة.

 

حضرتك بتستهين ب الولادة القيصري علي اساس انها بدون ألم والستات مش بتتعب فيها زي الولادة الطبيعية.

 

طيب احب افاجيء حضرتك واسالك .. عارف يعني ايه حقنه بنج نصفي في النخاع الشوكي ؟! عارف ألمها عامل ازاي ؟ عارف لو اتحركت حركة بسيطة ممكن تجيبلك شلل؟ او عالاقل تحس بكهربا في جسمك كله كأنك اتوصلت ب صاعق كهربا.

 

طيب عارف يعني ايه فتح سبع طبقات بطن.. كل طبقة منهم سميكة بتترفع زي المرتبة كدة .. سبع طبقات تتفتح عشان يوصل للقرار المكين اللي جواه البيبي.

 

طيب سمعت حضرتك عن الألم اللي بتحسه الأم اول ما تفوق من البنج سواء النصفي او الكلي وتبدأ تحس بوجع وألم لا يحتمل لان كل طبقات بطنها مفتوحة

الدكتور مجرد بيخيط الطبقه الخارجية ..لكن كل الطبقات اللي جوا مبتتخيطش بتفضل مفتوحة تلم بقي مع نفسها بالوقت .

 

طيب جربت حضرتك تكون كل طبقات بطنك مفتوحة كدة وبتتألم وتيجي ممرضة تضغط بكل قوتها علي بطنك . زي ما الحوض بيتسد وتخبطه ب ايدك كدة عشان يتصفي.. هي تقعد تخبط كدة عشان بواقي الدم ينزل ؟؟؟!! متخيل الألم..

 

تعرف حضرتك ايه عن وسط كل احساسك ده يحطو بيبي علي ايدك يلا رضعه!!

 

طب تعرف ايه عن الاحساس اللي بتحسه الأم بعد كل ده مباشرة لما يقولولها لازم تتمشي في طرقة المستشفي عشان الجرح ؟ قادر تتخيل يعني ايه بطن مفتوحة ولازم تمشي علي رجلك قادر تستوعب العياط والالم اللي مع كل خطوة ..

 

تعرف ايه انت عن البنج الكلي اللي بيسبب كحة وما أدراك يعني ايه كحة ولا عطسة وبطن مفتوحة .

 

تعرف ايه سيادتك عن ان قبل ما تكمل ٢٤ ساعه علي كل ده بيدولك بيبي تروح بيه يسهرك طول الليل عياط وصريخ وانت مش فاهم ايه اللي بيحصل اصلا ولا عارف تلاحقها من وجع القيصري اللي لا يحتمل ولا من صريخ الطفل.. اللي بيفضل شهور مخليك لا تعرف تنام ولا تاكل ولا تشرب .

 

جربت حضرتك وجع البنج النصفي وتأثيره بالسنين علي ان الضهر تحس فيه بألم؟ ورغم كدة تشيل طفلك ال ٢٤ ساعه !

 

جربت سيادتك صداع البنج النصفي اللي بيستمر اسبوع تقريبا بعد الولادة .. كأن حرفيا بدون مبالغة حد ماسك هون بيخبط بيه جوا دماغك .. دماغك من جوا بتترج حرفيا وعينيك مش قادر تفتحها

جربت تحط بنتك علي صدرك ترضع ومش قادرة اوطي دماغي ولا افتح عينيا اشوف اصلا بترضع ولا لا .. كنت بقول لماما شوفيها انا مش قادرة احرك راسي

 

لو الممرضة بتاعه حقنة المسكن اتأخرت كنت بموت من ألم الصداع .. وسط كل ده في بيبي قد ما ايدك عايز معاملة خاصة في القلع واللبس والحما و الرضاعه والبامبرز.. كل ده وانت مفوقتش اصلا من عملية مفتوح فيها بطنك

جربت حضرتك تعيط بسبب ألم الرضاعه وان النابلز بتاعة صدرك تموتك من الألم وتنزل دم وكأنها بتتدبح وبرضه لازم ترضع ؟!

 

تعرف ايه عن لو ربنا أراد تحمل تاني فجأة ف تفتح قيصري تاني بعدها ب سنة او سنتين و انت لسة مفوقتش من ألم القيصري الاول اصلا

 

تعرف ايه انت عن قوة الستات في تحملها الألم اصلا بتاع القيصري عشان تقلل منه وتحس ان القيصري سهلة ؟!

جربت ايه حضرتك مؤلم في الحياة اصلا يعادل الألم اللي انا كتبته ؟!

 

ايه بطولاتك في تحمل الألم اصلا مقارنة ب نص الألم بتاع القيصري؟

وفي الاخر يقولك دي سوسته بتتفتح و تتقفل تاني.